கத்துங்கிளி நிறைமதி

எங்கள் வீட்டு குட்டி இளவரசிக்கு இன்று ( 31-07-2024) பிறந்தநாள் - https://www.youtube.com/shorts/MKxWXnrboV4

தத்தையிவள் முத்துமகள்

தத்தித்தத்தி நடப்பாள்

கத்துங்குயில் வித்தைகளை

கற்றுப் புகழ் படைப்பாள்

முத்துதிரும் அத்தைமகள்

பெத்தெடுத்த சிறப்பாய்

எத்திசையுங் கத்துங்கிளி 

முத்துமணி பறப்பாள் 

வஞ்சிமொழி கொஞ்சுங்கிளி

நெஞ்சமதை மயக்கும்

கொஞ்சிக் கொஞ்சித் துஞ்சுமெழில்

நெஞ்சைத் துளைதுளைக்கும்

மஞ்சள் வெயில் கொஞ்சும் குயில்

கெஞ்சிக் கெஞ்சி அழைக்கும்

நெஞ்சமதில் மஞ்சமிட்டு 

மங்கையிவள் உறக்கம் 

கண்ணெதிரே கண்மணியே

பெண் குழந்தை ஜொலிப்பாள்

மண்ணுலகில் என்னுலகாய்

என் மகளே இருப்பாள்

என்னெதிரே கண்கள்வழி 

பெண்ணிலவே விழிப்பாள்

பொன்னுதிரும் புன்னகையே

இன்பமதில் திளைப்பாள்