பாடல் வரிகளை கேட்க, சேர்ந்து பாடி மகிழ - https://youtu.be/aTpM85MQYA0
நாளை (31-07-2023) அன்று என் இளைய மகளும் என் குட்டி இளவரசியுமான நிறைமதிக்குப் பிறந்தநாள். அவளின் பிறந்தநாளிற்காய் நான் மெட்டமைத்த/எழுதிய/பாடிய பாடல்.
சந்தமும் தொடைநயமும் துள்ளி விளையாடுகிறது இந்தப் பாடலில்...
குரலைக் கேட்டேன் துஞ்சியே
கெஞ்சிடும் குழவி அஞ்சியே - என்
தோளிலே ஆடிடும் துஞ்சியே
மலர்ந்த கைகள் செங்கையே
கங்கையே புனித கங்கையே - புது
மழலை பேசும் மங்கையே
தங்கமே ஜொலிக்கும் தங்கமே - என்
தேவதை அழகின் அங்கமே
பொங்குமே அழகு பொங்குமே - உன்
பொன்னிற மேனியில் எங்குமே
அன்னையே எனக்கு அன்னையே - என்
கண்ணெனக் காப்பேன் உன்னையே
விண்ணையே பார்த்தால் விண்ணையே - நிறை
மதியாய் உலவும் பெண்ணையே
செல்லமே எனக்குச் செல்லமே - உன்
பிறந்தநாளில் வெல்லமே
கள்ளமே இல்லா உள்ளமே - உனை
வாழ்த்திப் பாடித் துள்ளுமே
