ஆசராசாவே

ஆண்:

அத்தபெத்த என்னோட ஆசப்புள்ள – நீ

ஒத்துக்கிட்டா வாடிபுள்ள தப்பேஇல்ல

பெண்:

அய்த்தமகன் என்னோட ஆசராசாவே

அதுக்குள்ளே சிக்கமாட்டா இந்தரோசாவே

ஆண்:

வஞ்சி கொஞ்சம் வாடிபுள்ள

கஞ்சி தந்து போடிபுள்ள

பெண்:

கஞ்சிகொண்டு வாரேன்ராசா – என்

நெஞ்சம்நெறஞ்ச ஆசராசா

ஆண்:

அச்சமேதும் வேணாம்புள்ள

மச்சங்காட்டிப் போடிபுள்ள

பெண்:

மச்சங்காட்டச் சொல்வீரோ – பின்னே

மிச்சங்காட்டச் சொல்வீரோ

ஆண்:

சத்தான இளஞ்சிறுக்கி கத்தாழப் பழம்பொறுக்கி

அத்தான நீஉருக்கி செத்தேன்டி உன்னால

பெண்:

சுத்தாதே பின்னாலே பித்தானேன் உன்னாலே

அத்தான்னு சொன்னாலே செத்தேன்டா தன்னால

ஆண்:

பித்தந்தலைக் கேறிடுச்சு முத்தந்தந்தாய் ஆறிடுச்சு

நித்தம்நிலை மாறிடுச்சு சுத்தம்கித்தம் பார்க்காதே

பெண்:

சத்தம்போட்டுக் கேக்காதே பத்திக்கொள்ளப் பாக்காதே

கத்தும்கவி அத்தானே முத்தந்தந்தால் வேர்க்காதே

ஆண்:

தாலிகட்ட வர்றேன்புள்ள

தோழிபோல வாடிபுள்ள

பெண்:

தாலிதந்தா கவலையில்ல

வேலியில்ல வாடாஉள்ள

ஆண்:

அத்தபெத்த என்னோட ஆசப்புள்ள – நீ

பத்துப்புள்ள பெத்துத்தாடி தப்பேஇல்ல

பெண்:

அய்த்தமகன் என்னோட ஆசராசாவே – உன்

அன்பாலே சிக்கிப்புட்டா இந்தரோசாவே