வெள்ளையாடை தேவதைகள்

கவி பாடிய காணொளி - https://youtu.be/hI4ZhReRR6Y

வெள்ளைநிறச் சீருடையில் 

வந்தாளெங்கள் தேவதையே

முல்லைமலர் சிரிப்புடனே

முகமெல்லாம் புன்னகையே

உணவும் மறந்து உறக்கம் மறந்து

உயிர்கள் காத்திடும் தேவதைகள்

கனவும் கலைந்து கணவன் மறந்து

கருணை பொங்கும் காவியங்கள்

குடும்பம் மறந்து குழந்தை மறந்து

புன்னகை செய்யும் தாதியர்கள்

கவலை மறந்து கண்ணீர் மறைத்து

நோய்கள் விரட்டும் தூதுவர்கள்

கொட்டும் மழையை அடிக்கும் வெயிலைக்

கடந்தே செல்லும் காவலர்கள்

சொட்டும் கண்ணீர் உடல்வலி தாங்கி

பிணிகள் போக்கும் செவிலியர்கள்

ஊரும் அடங்க வீட்டில் முடங்க

கொடும்நோய் தீர்க்கும் ஓவியங்கள்

சிறுநீர் அடக்கி அமர மறந்து

நடந்தே திரியும் நல்லுள்ளங்கள்

உதிரப்போக்கும் கால்கள் வழிய

உயிரும் உருக உதிரமும் உருக

விடுப்பென்பதே கனவில் மட்டும்

மூன்றுநாள் கடந்தும் ரத்தம் சொட்டும்

உன்னைப்போல செவிலியர் பார்த்தால்

அன்னையைப் பார்த்தது போலாகும்

கண்ணைமூடி விசமும் குடித்து

உன் கை பட்டால் நோய்தீரும்

மண்ணில் வாழும் கடவுளையெல்லாம்

உன்றன் உருவில் காண்கின்றேன்

எல்லையில்லா ஆனந்தம் பெருகி

பல்லாண்டு வாழ வாழ்த்துகிறேன்